今日天氣超好，溫度竟然高達18度。於是大地之子話「go for a short walk」，點知一行就行左個半鐘。行嘅路線只係首都一條平凡嘅山路，平時遊客並唔會黎呢度，沿路一邊行，一邊見到幾個馬房，有人騎馬、有人放狗。而家係羊媽媽生羊咩咩嘅季節，一路見到好多羊bb跟住喺媽媽身邊。行到圖中小屋嘅時候，有對父女跑緊步，然後好親切咁同我地打招呼，之後話「喺呢度跑步對身心都好健康」的確，一路見到咁多美景，真係好治癒。
前年有個澳洲人，透過我ig搵到我嘅電郵，然後send左封email畀我，同我講佢黎過法羅一次就愛上左呢個地方，佢仲因為咁搵左個法羅男友，好想搬過黎，所以問我覺得呢邊生活如何，搬過黎要點做。喺電郵聯絡過幾次之後，有次佢黎法羅搵男朋友，我地就相約見面。我問佢點解澳洲有陽光與海灘咁正都唔住，反而想搬黎一年有3分 2時間都落雨嘅法羅。佢話佢喺工作同愛情上遇到好大挫折，當時黎法羅旅行，佢覺得呢度一切都好簡單，旅程之後，覺得傷口好似癒合左咁，想從頭開始，同擺脫以前複雜嘅生活，於是好想搬黎法羅，開展新生活。
我都覺得法羅係讓人放空嘅好地方。如果你覺得生活不如意，好想搵個無（咩）人（嘅）島閉關一下，不妨黎法羅抖抖氣，然後再重新出發❤️
#faroeislands #torshavn #hiking
Search